Trinamool-in MLA hel pali lakah action la dawn

All India Trinamool Congress (AITC) thuchuah chuan an MLA hel pali, Cong-ress zawm tate lakah 'legal action' an la dawn tih a tarlang.

TMC Manipur unit vice-president MI Khan chuan, “MLA pali-te hian AITC Manipur state unit emaw central-a kan hotute emaw hnenah banna an thehlut lo a, Congress an zawm dawn tih pawh kan hre lo" tiin, MLA-te chuan party aṭanga banna an thehluh loh thu a sawi. Khan chuan party pakhat aṭanga party dang zawm tur chuan an awm mekna party-ah banna an thehluh a ngai a ni a ti a, MLA pali-te chetdan chu 'anti-defection law' hmanga hrem theih an ni, a ti.

MLA pali - Th Shyamkumar, I Ibohalbi, O Lukhoi leh K Sarat-te hi AITC ticket-a thlantlin vek an ni. Th Shyamkumar hi Manipur State AITC unit president a ni a, amah bakah midang pathumte nen tun hnai khan Indian National Congress an zawm a ni.

AITC Manipur state unit hian tun dinhmunah State Legislative Assembly member 60 awmnaah member a nei tawh lo. 10th Manipur Legislative Assembly-ah khan AITC candidate pasarihte chu thlan tlin an ni. An MLA zinga mi M Kunjo chu a boral a,MLA dang pahnihn Kh Joykishan leh Th Bishwajit-te chu 10th Schedule of the Constitution tlawhchhanin disqualify an ni a, MLA pahnihte hi a hnuah BJP MLA atan thlantlin zui an ni. MLA pali an neih te'n Congress an zawm ve leh tak avangin MLA neiloin an awm mek a ni.