Guwahati court-ah Rahul inlan dawn

Congress vice-president Rahul Gandhi chu mi tihhmingchhiat thubuai (defamation case)-ah vawiin hian Guwahati court-ah a inlan dawn.

Rahul Gandhi laka thubuai hi Rashtriya Swayamsevak Sangh (RSS)-te'n an ziahluh a ni. December 12, 2015 khan Congress vice president hian Assam-a Vashnavite monastery tlawh tura a kal chu, RSS-te'n Barpeta Satra-ah an lo dang niin a sawi. Kha tih hun laia Assam chief minister Tarun Gogoi pawhin, Congress vice president hi RSS-te chuan dan tumin ruahmanna an lo siam niin a sawi ve bawk. Mahse RSS-te chuan Rahul dan tuma hma an lak loh thu leh intihhmingchhiat tumna mai a ni tiin, Rahul-a lakah hian intihhmingchhiat tumna thubuai an ziaklut ta a ni. Rahul Gandhi hian tlai lam dar thum vekah Vashnavite monastery hi a tlawh ta nia tarlan a ni.

Assam-a Congress sorkar hun laia chief minister Tarun Gogoi chuan, Congress vice-president hian court-a a inlan tur thu hi Thawhṭanni khan a tichiang tawh niin a sawi. Kamrup ( metropolitan) chief judicial magistrate (CJM) chuan August 6 khan Rahul Gandhi chu September 29-a court-a inlan turin a lo hriattir tawh a, he thubuai bika a inlan tawpna tur a ni ang.