Journalist beitute 'Non-Bailable Offence' siam sak tur an ni : Assam Speaker

Assam Legislative Assembly Speaker, Ranjit Kumar Das kaihhruainain Thawhlehni khan Guwahati Press Club-ah journalist-te tan 'interactive session' neih a ni a, Electronic Media Forum Assam-te'n an buatsaih a ni.

Session kaihruaitu Assembly Speaker leh journalist hlui ni bawk Ranjit Kumar Das chuan, "Journalist-te chu mipui tana hna thawk an ni a, an hna thawhna kawngah beih an tawk a nih chuan, pawikhawihtute chu 'non-bailable offence' siam sak tur an ni" tiin, hospital-a doctor-te kut thlak emaw beih an thiang lo ang bawka thil thiang lo a nih thu a sawi.

Speaker chuan Working Journalists’ Act chu ennawn a, siam ṭhat fo a ngai a ni a, journalist-te tan hian protection law mumal tak siam a ngai a ni, a ti. Kumar Das hi Assam-a chanchinbu lian tak pakhata thawk ṭhin a ni a, politics luhchilh zuiin, tunah chuan Assembly speaker a ni tawh a ni.

Das chuan tun hnaia state sorkar-in Kaziranga-a enviction drive a kalpui dan chungchang sawichhuakin, mipuiin an hriat bakah leh an hmuh bak tam tak journalist-te chuan an hria a ni, a ti. Mahse an thil hmuh leh hriatte chu, mipui hriata puan zar vek ṭul lo leh, a him tawk china hre tura a duh thu a sawi. Interactive session-ah hian journalist-te mawphurhna hrang hrangte inzirtir a nih bakah, journalist-te'n beih an tawh ṭhin dan te sawiho a ni. Speaker chuan Assam Assembly-ah media-te tan designated room siam tum mek a nih thu a sawi bawk.