Tripura-ah hmeichhe MLA-te'n House chhuahsan

Tripura Assembly Sesssion-ah, Thawhṭanni khan senior MLA hmeichhe pali-te chu sex worker-te leh AIDS/HIV+ pungzel sawiho a nih avanga lungawi loin, House an chhuahsan.

MLA-te chuan, "House-a sex worker-te chungchang leh AIDS/HIV+ chungchang sawi hi kan duh lo a, House kan chhuah san ta a ni" an ti. CPI (M) MLA Vijaylaxmi Sinha-i chuan House a chhuahsan hmasa ber a, hmeichhe MLA dang pathum Rita Kar Mazumder, Gouri Das leh Tunu Malakar-te chuan an zui a ni. Veteran Congress MLA Ratanlal Nath chuan hemi chung-changah hian special motion a pu lut a, sawiho zui a ni.

MLA Bijita Nath chuan, Tripura-a sex worker-te chu tute nge an nih hriat an nih loh thu sawiin, thla khata an lawmmman dawn pawh a beitham hle tih a sawi. Hetih lai hian NGO-te chu sorkar kum kal mekah social service work atan cheng nuai 56 pek an ni tawh tih a sawi. Ratanlal Nath chuan, information aṭanga a lan dan chuan Tripura-ah hian AIDS control society-ah sex worker 5148 an awm tih sawiin, an zinga 90% chu hmeichhia an ni. A tam zawk hi AIDS/HIV+ vei an ni a, 10% chu drugs-a injection ṭhin an ni, a ti.

State health minister Badal Chowdhury chuan, AIDS control society chu National Aids Control Organisation (NACO) kaihhruaina dan zam hnuaiah a kal tih a sawi ve bawk. Hetih lai hian opposition Trinamool Congress (TMC) student wing-te chuan state sorkarin Scheduled Caste, Scheduled Tribe leh Other Backward Class candidate-te BSc (nursing) leh GNM course-a a sponsor chungchang chu ngaithuah ṭha leh tura phutin, Tripura Legislative Assembly luhna gate an dang ve bawk.