Hmarchhak tan IAF inhawng

Indian Air Force (IAF) chuan hmarchhak huam chhunga airstrip, airfield leh Advance Landing Grounds (ALGs)-te chu khualzin phurtu, commercial aircraft atana hman theih a nih tur thu a sawi.

Defence Ministry thupuangtu Captain Amit Mahajan chuan, "Heng airstrip, airfield leh ALG-te hi civil miten an hman ve theih turin ruahmanna siam a ni dawn a, a ṭul dan a zirin commercial aircraft atan pawh hman theih a ni ang" a ti. Hmarchhakah hian IAF chuan airfield - Bagdogra (West Bengal) leh Assam-a Tezpur, Jorhat leh Kumbhirgram-ah te a nei a, hengte hi commercial atan hman mek an ni hlawm. Mahajan chuan Arunachal Pradesh-a Zero, Pasighat, Along leh Mechuka-ah te ALG hawn a ni tawh tih a sawi.

Hetih lai hian Air Force Day lawmna chi khat atan, Shillong-a Eastern Air Command headquarters chuan ni thum awh ‘AIR FEST 2016' a buatsaih dawn a, September 30 aṭangin ṭan a ni ang.