Garo Hills Entry point kharah vau

Assam-a pawl hrang hrang 40 chuan October 29 aṭangin Meghalaya-a Garo Hills entry point hrang hrangte kharah an vau. 

Kawng khar tum zingah hian  All Assam Students' Union (AASU), All Bodo Students Union (ABSU), All Moraan Students Union (AMSU) leh trade association hrang hrang an tel. Kawng dan an tumna chhan hi Meghalaya sorkarin hripui leng vanga Assam-a sumdawngte laka khuahkhirhna a siam vang a ni. 

Pawl hrang hrangte chuan  thuchhuah inṭawm siamin, "Ram pumah insumdawn tawnna leh inkalpawhnate hawn a ni tawh a, hetih laiin Meghalaya sorkar chuan Assam leh state dang mi sumdawngte lakah khuahkhirhna a la siam zui reng a ni. Ministry of Home Affairs ngei pawhin state sorkarte chu sumdawnna leh inkalpawhnate khuahkhirh tawh lo turin a ti a, mahse Meghalaya sorkar chuan a zawm duh lo a ni," an ti. 

Assam-ah Meghalaya mi tan khuahkhirhna siam a ni tawh lo tih sawiin, "An duh anga an chetvel phalsak an nih laiin an state-ah erawh kan kal thei lo a ni. Lut turte an dang zel dawn a nih chuan, an state mi leh sate pawhin Assam an lut bik tur a ni lo. Hei vang hian Daranggre leh Agia inkara Meghalaya aṭanga Assam lut tur motor-te kan dang ve vek dawn a ni," tiin an sawi. 

Meghalaya-in state dang mi tana khuahkhirhna a la siam chuan sumdawngte harsatna a thlen tih sawiin, midang rawih chhawn an ngaih phah a, hei vang hian Meghalaya-a bungrua lutte chu a man a san phah a ni, an ti.