Arunachal-ah online tax payment kalpui dawn

Arunachal Pradesh deputy chief minister Chowna Mein chuan online-in chhiah pek a theih a ni thuai dawn tih a sawi.

Mein hian tunhnai khan Indian Oil Corporation Ltd (IOCL) Assam Oil Division, executive director, Dipankar Roy chu meeting neihpuiin, he thu hi a sawi a ni. Mein chuan chhiah chu dik leh felfai zawka lak a nih theihna turin, online-a pek theih turin duan mek a ni a, peih fel a nih hunah chuan mipuiten awlsam zawkin an pe thei tawh dawn tih a sawi. Private company leh industry-te chu hna thawk tur hian thlan an ni dawn tih a sawiin, private investor-te tihhmasawnna tura sorkar hmalakna a nih thu a sawi.

Deputy CM chuan, "Goods and Services Tax (GST) a taka hman anih hunah chuan online-a chhiah pek chu tihmakmawh a ni dawn a, chu chuan nasa takin chhiah luangral tur a veng thei dawn a ni", a ti. Arunachal Goods Tax Act leh Arunachal Entry Tax Act, 2010 chu GST ataka hman a nih hmain siamṭhat a nih tur thu a sawi bawk. IOCL executive director, Dipankar Roy chuan meeting-ah hian Arunachal tan Indian Oil Corporation chuan petrol, diesel leh kerosene-te a pek chhunzawm zel tur thu depputy CM a hrilh a, Doimukh depot chu December 2018-ah hawn hman beisei a nih thu a sawi bawk. IOCL hi Arunachal sorkar tana chhiah thawh hnem berte zinga mi a ni.