Arunachal: Hmarchhak state sorkar zinga AI hmang hmasa ber

Arunachal Pradesh sorkar chu hmarchhak bialah sorkar rorelnaa policy enkawl leh project ruahmanna kawnga Artificial Intelligence (AI) hmang hmasa ber a ni.

State sorkar hian department 67-in Monthly Development Report (MDR) an thehluhte thlirletna turin advanced AI system a siam a, hei hi thutlukna siam leh rorelna ṭha zawka kalpuina tura a ruahmana ni. Department tinte hian MDR hnathawh dan kimchang, sorkar agenda, budget hman dan, cabinet thutlukna, flagship scheme zingah PM Flagship leh Chief Minister Flagship-a hmalakna, online service, e-Office hnathawh leh mipui vantlang harsatna tawhte chu CPCRAMS leh CM Jansunwai platform-ah an thehlut a ni. Hei bakah sorkar hna ruak, legislative update, leh MDoNER leh NEC hnuaia project lian tham leh pawimawh tak takte an tarlang tel bawk. Heng report te hi thla tin ni 7 hmain portal-ah an upload ṭhin.

AI system chuan heng MDR te hi uluk takin a zirchiang a, thla tin review meeting neihnaah State Chief Secretary-in a enfiah a, zirchianna report kimchang tak a siam chhuak ṭhin. He syste hian raw data chu awmze nei takin a hrilhfiah a, he hmalakna hian rorelna kalphung a tichak a, mipui hamṭhatna tura hmalaknate a hun taka kalpui a nih theih nan a pui thei bawk. He AI-driven system-a thil langsar ber chu real-time visualisation nei, interactive dashboard a ni a, sorkar official-te tan hna a ti awlsam a ni.

Official-te chuan he hmalakna hi tunlai rorelna kawnga hmasawnna pawimawh tak a nih thu sawiin an fak a, Arunachal Pradesh chu langtlang, leh policy rintlak kalpui theihna tura AI hmanga hmahruaitu a ni, an ti.