Manipur: DGMO in Manipur tlawh

Indian Army-a Director General of Military Operations (DGMO), lieutenant general Rajiv Ghai chuan Manipur a tlawh a, tualchhung dinhmun bakah Indo-Myanmar ramri-a venhimna kalpui dante a zirchiang. DGMO hian Manipur chief minister aṭanga N Biren Singh a ban hnu leh, President's Rule hman a nih hnuah a tlawhna hmasa ber a ni. Manipur-a ni hnih a cham chhungin Lt Gen Ghai hian governor Ajay Kumar Bhalla leh official pawimawh eng emaw zat a hmu a, chung zingah chuan State Security Advisor, Chief Secretary, leh Director General of Police te pawh an tel.

DGMO hian Indian Army-te inbuatsaih dante enpuiin, Indo-Myanmar Border (IMB)-a venhimna dinhmunte a endik a, hei bakah hmun ralṭi leh derthawng zual laia venhimna kalpui a nih dante pawh a endik bawk, tiin Ministry of Defense chuan a sawi. Official-te nena an inkawmnaah boruak pangngaia a awm leh theih dan turte, a bikin ramri lam enkawlna tih changtlun leh Indo-Myanmar ramria security infrastructure tih chak a ṭul thute an sawi a ni.

Manipur-ah hian 2023 May thla aṭang khan Meitei leh Kuki hnam inkarah buaina nasa tak a chhuak a, hei vang hian mi 220 chuang thi tawhin, mi sang tel an insawn chhuak tawh bawk. Chief minister N Biren Singh chu tualchhung buaina a chhuah aṭanga kum hnih dawn liam hnu, February 9 khan CM aṭangin a bang a, President’s Rule chu February 13 aṭang khan hman ṭan a ni bawk.