Meghalaya-Assam inkarah seaplane service tir tum

Meghalaya sorkar chuan Assam nen an inkalpawhna tih changtlunna turin seaplane service tir a tum. Seaplane hi Umiam Lake aṭanga Assam-a hmun pawimawh tak takah a service tir dawn a, heng zingah hian Kaziranga National Park pawh a tel ang.

He hmalakna hi sorkar laipuiin UDAN 5.5 scheme a siam hnuaiah kalpui tum niin, seaplane hi Assam bakah state chhunga Garo Hill-a Baljek Airport-ah pawh service tel tir tum a ni bawk.

Official-te chuan Umian Lake aṭanga seaplane service tir tum chungchang hi aviation company eng emaw zatin an ngaihven tawh tih sawiin, state sorkar chuan Umian Lake chu water aerodrome-a siam turin Airports Authority of India (AAI) puihna pawh a ngen tawh a ni.

Sorkar laipui chuan Umiam Lake cheina atan leh, Mawkhanu-a tourist hub thar siamna atan Special Assistance to States for Capital Investment’ scheme hnuaiah Rs vbc 199 a lo ruahman sak tawh bawk. Hemi hmang hian craft village, arts and culture pavilion, batonical garden, amphitheater-te siam bakah, infrastructure awm sate pawh cheiṭhat tum a ni.

Umian Lake hi kumtin tlawhtu mi 16,000 vel an awm mek a, hei hi chei ṭhata tlawhtu mi nuai 1.3 vel tlintir tumin an ruahman a ni. Khualzin hiptu ṭha tak niin,hei vang hian direct leh indirect-in mi 3,800 in hna thawhtur an neih phah a ni. State sorkar chuan Umiam Lake bula hian seven-star hotel siam pawh a tum bawk.