Assam-Bhutan rel kawng project report thehluh a ni

Assam-a Kokrajhar leh Bhutan-a Gelephu inkalpawhna tur rel project siam tur chungchangah chak taka hma lak mek a nih thu leh, sorkar laipui hnenah project report theh luh a nih tawh thu Northeast Frontier Railway (NFR) chuan Inrinni, March 1 khan a sawi.

Railway minister Ashwini Vaishnaw-a'n ramri kaltlanga inkalpawhna ṭha zawk leh ram pahnihte inlaichinna tihchakna tura Assam-Bhutan rel kawng thar a puan aṭanga kar khat pawh tling loah, NFR chuan locational survey hnuhnung ber chu zawh fel a nih tawh thu a sawi. Project report kimchang chu sorkar pawmpuina leh hmalak zel turin theh luh a ni.

Km 69.04-a thui rel kawng siam tura ruahmanna hi Rs vbc 3,500 sen a ngai dawn nia chhut a ni. Rel kawng bakah he project hnuaiah hian station thar paruk- Balajan, Garubhasa, Runikhata, Shantipur, leh Dadgiri (Assam chhim lam Bodoland Territorial huamchhunga awm vek) leh Gelephu-ah siam tum a ni. Infrastructure plan-ah hian kawngpui lian 31, kawngpui tenau 65, overbridge, underbridge 39 leh meter 11-a sei viaduct pahnih dah tura ruahman a ni bawk.

Rel kawng siam hian India leh Bhutan inlaichinna nasa takin a tichak dawn a, ram pahnihte insumdawn tawnna, khualzin, leh mipuite intlawh tawnna lamah a pui dawn a ni. Inkalpawhna lam a ti changtlung dawn a, rel hmanga Bhutan tlawhpawhna tur hmasa ber a ni dawn bawk a ni.