Voice vote-in Nagaland budget 2015-16 pass

Nagaland finance porfolio changtu, Chief Minister TR Zeliang-a'n July 23-a kum 2015-16 state budget a pharh chu Thawhṭanni khan pass a ni.

Kum 2015-16 state budget-ah hian vaibelchhe 12,592.69 ruahman a ni a, state sorkarin sum lakluh a beisei chu vaibel­chhe 12041. 83 niin, senso-ah vbc 12582.20 vel ruahman a ni. Kum 2015-16 ah state sorkarin negative balance vbc 1308.32 an neih tur thu Zeliang chuan sawiin, opening negative balance vbc 117.97 an neih sa nen financial year 2015-16 tawpa an negative balance chu vbc 1426.29 a tlin tur thu a sawi.

Budget sawihonaah Chief Minister Zeliang chuan sorkar laipuiin Planning Commission thlakna atana a din, NITI Aayog chu bul ṭan chho mek a nih avangin pangngai taka a kal theih nan thla khat vel hun a la mamawh thu a sawi a, sum negative balance an neih chu a pun belh loh nan member te chu sum hmanchhuah danah fimkhur turin a ngen.

Zeliang chuan sorkar laipuia Nagaland innghahna tihnep nan chhiah tihpun a pawimawh thu uar takin a sawi bawk a, hemi atan hian sorkar leh mipuiin an ngaihdan an thlak a ngai a ni, tiin a sawi.

Nagaland Chief Minister chuan state intodelha Nagaland siam a tum thu sawiin, task force te kaihhruaina hnuaiah agriculture leh allied sector lam tihchangtlun beihpui thlak a nih tur thu a sawi bawk.

Chhiah lak tihpunna atana mipui­te ngaihdan thlak a ṭul thu a sawi chungchanga MLA Levi zawhna chu Zeliang chuan chhang­in, tuialhthei leh gas zawnna beih­pui thlak mekah mimal ram lak chung­changah a neitute'n harsatna an siam ṭhin thu a sawi a, hemi kawngah hian an bial mipuite rilru hneh tum ṭheuh turin MLA te a ngen.