Tripura-in AIDS natna veite Thla hlawh siamsak dawn

Tripura-a Left Front sorkar chuan hmeichhia mi ina sekrek khawiha inhlawh te, nihna thlak thleng te (transgender), phar natna vei, AIDS natna vei te leh angan­wadi-a hnathawkte tan thla hlawh siamsak a tum.

Tripura Chief Minis­ter Manik Sarkar chuan Thawhlehnia cabinet mee­ting an neih zawhah he thu hi sawiin, mi chi hrang hrangte thla hlawh siam­sak nan state sorkarin scheme 20 chuang a kalpui tih a sawi a, scheme hamṭhatna hi thla khatah mi 107,060 chuangin an dawng a ti.

"Hmeichhia mi ina sekrek khawiha inhlawh te, nihna thlak thleng te(transgender), phar natna vei, AIDS natna vei te leh anganwadi-a hnathawkte hnena thla tin Rs 350 kan pek ṭhin chu cabinet meeting chuan Rs 500-ah tihpun a remti a ni," tiin Sarkar chuan a sawi.

Heng mite thla hlawh a tihpun avangin Tripura chuan sorkar sum bawm aṭangin vaibelchhe 2.33 a sen belh a ngai dawn a ni.

State cabinet meeting chuan anganwadi hna­thawkte leh a puitute kum 60 an tlin hnua an hna an chawlhsan hnuah thla khatah Rs 500 leh Rs 350 lawm­man siamsak a remti bawk.

Chief Minister Sar­kar chuan anganwadi hnathawkte leh a puitute chu thla tina lawmman lak ai chuan vawi khatah a hlawmin Rs 50,000 leh Rs 30,000 an lak theih tur thu a sawi bawk.