Manipur bandh-in nunphung tikhaihlak nasa

Joint Committee On The Inner Line Permit System (JCILPS)-in July 8-a kawngzawh a huaihawt ṭuma police te nen an innawrnaa police kut tuara zirlai pakhat thih avanga lungawi lo, Joint Action Committee (JAC)-in Thawhlehni zing aṭanga darkar 38 awh bandh a huaihawt chuan nunphung a tihkhaihlak nasa hle.

JAC chuan zirlai pakhat, Sapam Robin­hood Singh thihnaah hian state sorkar chu a mawh­phurhtu police te laka action la duh loah a puh a, hei vang hian a lungawi loh lantir nan leh pawikhawihtute hrem phutin bandh a huaihawt a ni.

Thawhlehni khan JAC activist te chuan Imphal hmun hrang hrangah kawngpui dan nan lung leh thing tumte an dah a, hmun ṭhenkhatah motor ke hlui an hal bawk. Im­phal aṭanga lirthei lut leh chhuak a awm lo a, JAC activist bak khawlaia chhuak hmuh tur an awm lo bawk.

Hetihlai hian Seijang Makha Leikai-ah chuan JAC activist te hian lir­thei tlan chhuak eng emaw zat an halsak.

Nimin pawh khan sumdawnna hmunpui te chu khar vek an ni a, sorkar office ṭhenkhat inhawng mah se hnathawk hmuh tur an tlem hle. Bandh hian nimin tlai dar 7 thleng a awh.