Assam-in revenue vbc 600 a hloh

Dan phal loha meizial leh zu hralh tam avangin Assam sorkarin kum khatah vaibelchhe 600 a hloh.

Dan phalna hnuaia Assam-a meizial sumdawnna kalpui hi a tlahniam chak hle a, state pumpuia phalna nei loa meiziala sumdawnna hi 25% a tling.

FICCI CASCADE (Committee Against Smuggling and Counterfeiting Activities Destroying the Economy) zirchianna chuan India ramah zuk leh hmuama sumdawnna aṭangin sorkarin revenue a hloh hnem ber tih a tarlang a, kum 2014 khan vaibelchhe 9,139 a hloh tih a tarlang. Dan phalna loa sumdawnna kalpui a nih avanga sorkar laipuiin a sum a hloh tamna dang chu mobile phone leh zu a ni. Meghalaya state chuan heng sumdawnna aṭang hian revenue vaibelchhe 100 a hloh bawk.

Hmarchhak bialte hi ramri venhim ṭhat loh a nih avangin ṭhenawm ram aṭanga meizial man tlawm a ruka lakluh a ṭhahnem hle a, hei vang hian sorkar chuan chhiah a lak theih tur sum tam tham tak a hloh phah a ni.

FICCI CASCADE adviser PC Jha chuan FICCI CASCADE report, ‘Illicit Market: A Threat to Our National Interest’ tlangzarh ṭuma thu a sawiah sorkarin value-added tax (VAT) a lak hnem lutuk avangin dan phal loh, a ruka sumdawnna kalpui a hluar a ni, a ti.

Assam-ah pawh dan phal loha zu sumdawnna kalpui a hluar hle a, ram pawn aṭanga zu lakluh leh Indian made foreign liquor (IMFL) te chu sorkar pawmpui loha hralhchhuah tam berte an ni.

Hetihlai hian FICCI CASCADE advi­ser, Deep Chand chuan dan phal loha sumdawnna kalpuinaah hel pawlte an inhnamhnawih a rin thu a sawi.

Assam-a Additional Director Ge­neral of Police (Crime Branch) Mu­kesh Sahay pawhin hel pawlte an inhnam­hnawih ngei a ni tih finfiahna nei lo mah se dan phal loha sumdawnnaah an inhnamhnawih a rin thu a sawi bawk.