Guwahati hotel-ah chhungkaw pakhat thiin hmu

Assam police-te chuan Nilaini khan Guwahati-a hotel pakhat-ah chungkaw pakhat chu thiin an hmu a, an vai hian mi pali an ni.

Thi te hi chhungkaw pa ber Prasanta Kalita (36), a nupui Pompi Kalita (26), an fanu kum li mi leh an laina Anamika Kalita (21)-te an ni.

Mitthite ruang hi Hotel Sun City Room No. 102-ah hmuh an ni. Hotel manager chuan, "He mite chhungkua hian Thawhlehni khan Hotel Sun City hi an rawn thleng a, a tuk zing thlengin tumah room aṭanga tho chhuak an awm loh avangin, police kan hriattir nghal a ni" a ti. Room chhung hi ventilator aṭangin a hmuh theih a, hemi te chhungkua hi an va hmuh chuan an lo thi fel tawh nia tarlan a ni. Police-te chuan kawngkapui tichhiain room chhung hi an lut a, an ruang hi an la chhuak a ni. Ruangte hi post-mortem a ni a, result erawh hriat a la ni lo.

He thil thleng hi chhui chian mek a ni a, mahni intihlum an ni em tih erawh hriat a ni lo. An chhungkua hi Darrang district-a Sipajhar area-a khawsa an ni. An chhung hnaite chuan, Kalita hian mi hrang hrang hnen aṭangin sorkar hna hmuhsak thei nia insawiin, pawisa a la khawm a, sorkar hna a pek theih loh bakah, pawisa pek let tur a neilo niin an sawi. Tun hnaiah Kalita hian depression a nei nasa hle tih an sawi bawk.