Khandu-a'n ‘Go-Live’ project hawng

Arunachal Chief Minister Pema Khandu chuan Nilaini khan ‘Go Live’ e-governance project a hawng a, hei hi Itanagar Municipal Council (IMC) tana hman tura ruahman a ni.

He project hi Jawa-harlal Nehru Urban Rene-wal Mission (JnNURM) hnuaiah kum 2012 khan Urban Development hmalaknain bul ṭan a ni. Hyderabad-a hmunpui nei IT company - M/s Navayuga Infotech Ltd leh Telearc Technologies Pvt Ltd ṭangkawpte'n project hi an thawk a ni. Nabam Tuki kaihhruai Congress sorkar hunlaia Urban Development minister ṭhin, tuna chief minister ni ta Pema Khandu-a bulṭan a ni. Khandu chuan, "‘Go Live’ hawn a ni ta hi ka lawm hle a, ka suangtuahna chu a takin a thleng dik ta a ni" tiin, bulṭantu zinga a tel thei leh a hawngtua a ṭang thei chu lawmawm a tih thu a sawi.

CM chuan IMC chu local body zinga e-gover-nance hmasa ber a ni thei chu a lawmpui thu sawiin, hmasawnna ropui tak a ni, a ti. Eirukna do turin state sorkar chuan hmalam a pan zel a, tunah chuan rahbi thar a kai leh ta a ni, a ti bawk. Urban Development minister Nabam Rebia pawhin lawmpuina thu sawiin, mipuiten ṭangkai taka an hman theih a beisei thu a sawi. Inter-state bus terminal, parking lot, convention hall, MLA apartment leh hmun dangah te internet hmanga hnathawh a nih zel theihna turin hmalak a nih thu leh, sorkar laipui scheme ringawta innghat loa state anga hmalak a ngai tih a sawi bawk.

Mipuite chuan online-in birth certificate, death Certificate leh Trade License-te pawh awlsam zawkin an la chhuak thei tawh dawn a ni.