Nagaland pawl hrang hrangin AFSPA pawhsei sawisel

Sorkar laipuiin Nagaland-a sipai hnena thuneihna sang pekna, Armed Forces (Special Powers) Act, (AFSPA) thla ruk dang a pawhsei chu civil society group, sorkar official leh eptu party hrang hrangte'n na takin an sawisel. 

Nikum December 30 khan sorkar laipui chuan hriattirna tichhuakin, Nagaland state pum chu buaina leh hmun hlauhawm a la nih avangin AFSPA hman mek chu thla ruk dang pawtseiin, kumin July thla thlenga hman chhunzawm leh turin a ti a ni. 

Sorkar laipui thuchhuak hi state sorkar official, eptu party bakah pawl hrang hrang - likeNaga Hoho, Naga Mothers Association (NMA), Naga Students' Federation (NSF) leh Nagaland Tribes Council (NTC)-te chuan an sawisel. 

Nagaland sorkar chuan AFSPA hman hi a hma pawhin a lo sawisel fo tawh ṭhin. Official chuan sorkar laipuiin Nagaland 'disturbed area' a puan hma hian state sorkar ngaihdan chu a zawt fo ṭhin tih a sawi a, mahse hetichung hian he dan hi pawhsei a ni zel tho niin a sawi.

 

Naga Hoho general secretary K Elu Ndang pawhin AFSPA chu tunlai khawvelah hman a ṭul tawh lo tia sawiin, he dan hi mipui pawisawi lote rikrapna leh hlauhna siamsakna chauh a ni, a ti. 

NMA president Abei-u Meru pawhin Nagaland-a AFSPA pawhsei a nihna chhan chu a hriat lo thu leh, sorkar laipuiin security force-te tih lawm a tumna mai nia a rin thu a sawi bawk.