Hmarchhak tan PPP model a fuh tawk lo : Tripura CM

Tripura Chief Minister Manik Sarkar chuan hmarchhak huamchhunga infrastructure tihmasawnna thawh kawnga public-private partnership (PPP) model hman chu a fuh tawk lo tih sawiin, a kaihhruai sorkar chuan a thlawp lo tih a sawi.

Nilaini khan North East Connectivity Summit chu Tripura khawpui, Agartala-ah neih a ni a, Sarkar chuan thu sawiin, “Infrastructure development atana PPP model hman chu tlangramah chuan thil khirhkhan tak a ni. Private investor leh industrialist-te'n motor kawngpui, railway leh power plant-te din turin tlangram an pan lo ang" tiin, PPP model chu hmarchhak tan chuan thil ṭangkai lo niin a sawi.

Sarkar chuan, Prime Minister Naren-dra Modi-a kaihhruai sorkar chuan Planning Commission chu NITI Aayog-ah thlakin, Tripura chuan kum tin cheng vaibelchhe 1,800 a hloh phah niin a sawi. Sorkar laipuiin infrastructure development policy a duan te chu ṭangkaina nei lo leh hmarchhak hmasawnna tak tak ngaihtuah tawk lo niin a sawi. Hmarchhhak chu China, Bangladesh, Bhutan leh Myanmar-te'n an ri tih sawiin, ramrite chu ngaihthah a ni, a ti bawk.

Ficci North East Advisory Council Chairman Ranjit Barthakur chuan, he summit-a hian expert, diplomat, official leh investor-te'n infrastructure development leh a kaihhnawih, technology, healthcare, agriculture, bamboo plantation, connectivity, development of border infrastructure leh road, air leh water development chungchangah zirtirna an pe tih a sawi.

Ni thum awh summit hi Tripura sorkar leh Federation of Indian Chambers of Commerce and Industry (Ficci) ṭangkawpten an buatsaih a ni a, Russia, Japan, Myanmar, Bangladesh, Nepal leh Bhutan aṭang pawhin summit hi chhimtu an awm a ni.