Imphal Airport-ah thuthang dik lo vangin flight titlai

Imphal Airport-a Air Asia passenger pakhat Paocha Robinson chuan Nilaini khan cabin crew hnenah bomb a pai niin a sawi a, hei vang hian thlawhtheihna pawh dintirin enfah a ni. Mahse thu dik lo a ni tih hriatchhuah a ni a, passenger hi man nghal a ni.

Hetiang thil hi Manipur-ah a thlen vawi khatna a ni a, thuneitu lam chuan an la thutak hle. He thil thleng vang hian Imphal-a Tulihal inter-national airport leh airport dangah te venhimna khauh zawka kenkawh nghal a ni.

Air Asia hi Ningani dar 11: 30 a.m-a Guwahati, Assam pana thlawk chhuak tur a ni a, mahse bomb pai nia insawi avang hian a thlawh hun pawh tihkhawtlai a ngaih phah a ni. CISF personnel-te chuan passenger-te hi an dap nghal a ni. Bomb pai nia insawi Robinson hi man nghal a ni a, eng vanga hetianga che nge a nih chhui chian mek a ni. Chawhnu dar 2:40 ah Guwahati panin a thlawk chhuak thei chauh a ni.

Hetih lai hian Manipur sorkar chuan Union Ministry of Civil Aviation hriatpuinain Tulihal international airport chu a hming thlakin, Bir Tikendrajit internatio-nal airport tih a ni. Tran-sport Commissioner M Lakshmikumar Singh chuan Chief Minister O Ibobi Singh kaihhruainain Imphal-a International Airport tihchangtlun dan tur ngaihtuahin Cabinet meeting neih a nih thu a sawi. Mipuiten Tulihal international airport chu mimal hminga thlak an duh tih hriat a ni a, ngun taka ngaihtuah a nih hnuah cabinet chuan pawmin, Union Ministry of Civil Aviation-ah thlenin, an pawmpui ta tih a sawi. Bir Tikendrajit international airport hming putu, Bir Tikendrajit hi Manipuri prince tiin an sawi ṭhin a, British hun lai, August 13, 1891 khan Imphal-ah khaihlum a ni.

India ramah hian mimal hmingchawi airport eng emaw zat a awm tawh a, Indira Gandhi International Airport (Delhi), Netaji Subhas Chandra Bose Inter-national Airport (Kol-kata), Chattrapati Shivaji International Air-port (Mumbai) leh Lokpriya Gopinath Bordoloi Interna-tional Airport (Guwahati) te chu a lar zual an ni.