Manipur-a political party-te'n single-phase poll an duh : ECI

Election Commission of India chief election commissioner Nasim Zaidi chuan, nakkuma Manipur state assembly election neih turah Political party-te chuan inthlanna thianghlim leh felfai a awm theihna turin ṭum khata zawh fel, 'single-phase poll' hman an duh tih a sawi.

Chief election commi-ssioner leh ECI member dang pariatte chuan Thawhlehni khan Imphal an thleng a, ni hnih an cham chhungin Manipur chief secretary bakah sorkar mi pawimawhte meeting an neihpui. ECI palaite hian nakkuma Manipur state assembly election neih tur atana inbuatsaihna hrang hrangte a hmunah kalin an enfiah a ni. Commissioner chuan 'single-phase poll' hi party hrang hrangte chuan an duh niin a sawi a, inthlanna thianghlim leh felfai zawk a awm theih an beisei a ni. Ni khatah inthlan zawh fel a nih chuan, vote thlak nawn leh thil fel lo dang awm thei eng emaw zat pumpelh theih beisei a nih thu a sawi. Tuna sorkar ding lai mek hi nakkum March thla khian a term a tawp tawh dawn a, April thlaah inthlan hi buatsaih tum a ni.

A vawi khatna atan Assembly Constituency
ṭhenkhatah Voter Verifiable Paper Audit Trail (VVPAT) hman a ni dawn a, hemi tur hian inbuatsaihna pawh kalpui mek a ni.