Manipur Congress-in hri darh chak chhanah sorkar a puh

Manipur Congress chuan an state-a Covid-19  hri a darh chak chhanah leh thihpui an tam chhanah rorellai, BJP kaihhruai sorkar a puh. 

Congress hruaitu leh chief minister hlui Okram Ibobi Singh chuan state sorkar chu hri leng dona leh khuahkhirhna kawngah a hlawhchham der a ni, a ti. 

Hri leng dona kawnga hmalakna ṭha leh awmze nei zawk siam tura sorkar phutin state chhunga zirlai pawl paruk chuan nawrh an lo huaihawt tawh bawk. 

Tun hnaiah Imphal-a JNIMS hospital-a thawktu 150 zetin hri an kai tih hmuh chhuah a ni a, an zingah hian doctor-te pawh an tel. Hei vang he hospital hi Ningani aṭang khan khar a ngaih phah a ni. 

Ibobi Singh chuan state sorkar  hmalakna ṭhat tawk loh chu mipuiten an tawrh phah tih sawiin, Covid-19 kai tih hmuh chhuahte chu sorkar chuan a enkawlna hmunah rang takin a dah ṭhin tur a ni, a ti. Hri darh tur venna kawnga hma a lak ṭhat tawk loh lai a, sorkarin state puma total lockdown puan leh mai a ngaihtuah chu awmze nei lo nia sawiin, CM hlui chuan total lockdown puan leh ringawt chuan mipui harsatna a belhchhah zawk mai dawn a ni tiin a sawi bawk. 

Congress chuan chief minister N Biren Singh kaihhruai BJP ṭangrual sorkarin parliament secre­tary atana MLA 12 a ruatte chu disqualify tura phutin Governor hnenah kar liam ta Zirtawpni khan memorandum an thehlut bawk a ni. 

Eptu party chuan Manipui High Court-in parliament secretary atana MLA 12-te ruat an nihna, Manipur Parliamentary Secretary (Appointment, Salary and Allowances and Miscella­neous Provisions) Repealing Act, 2018 chu rin tlak loh leh ram danpui mil lo tiin a lo puang tawh tih an sawi a, hei vang hian a ṭul anga hma la zui turin Governor hi a phut tih an sawi.