Meghalaya-in Assam nena ramri buaina chinfel sak turin sorkar laipui an nawr

Meghalaya-a political party hrang hrangte chuan Assam nena state ramri chungchanga hun rei tak buaina an lo neih tawh chu chinfel sak turin sorkar laipui an nawr. 

Assam-Meghalaya ramri hi km 885-a thui a ni. State pahnihte hian ramria hmun 12 velah buaina an nei a ni, ramri buaina chinfel dan ngaihtuah hian chief minister leh chief secretary level inbiakna pawh an lo nei fo tawh a ni. 

Ramri buaina chinfel sak tura sorkar laipui nawrtu zingah hian Meghalaya-a rorellai, National People's Party (NPP) kaihhruai ṭangrual sorkara tel, Bharatiya Janata Party (BJP) pawh an tel. 

BJP MLA Sanbor Shullai chuan union home minister Amit Shah hnenah lehkha thawnin, Assam-Meghalaya ramri inchuhna hmunah buaina a chhuah fo thu leh, ramri chhehvela chengten harsatna an tawh phah nasat thu a sawi. "A chang chuan ramri chungchanga buaina chhuak hian state chhung hmun dangte pawh a kangkai la, boruak ṭha lo tak a chhuah phah ṭhin a ni," a ti. Shullai bakah BJP MLA dang, health minister ni mek Alexander Laloo Hek pawhin state pahnih ramri chinfel thuai a ṭul thu a sawi. 

Meghalaya-Assam ramri buaina neih mek chu chinfel thuai a ngai tih sawiin, Regional Democratic Alliance (RDA) leh  Hill State People's Democratic Party (HSPDP) aiawhte chuan chief minister Conrad Sangma an lo hmu tawh bawk. 

RDA leh HSPDP hruaitute chuan ramri buaina chungchangah sorkar laipui chu a ngawi reng tur a ni lo tih sawiin, Assam chauh ni lo Meghalaya hian Sikkim tel loin hmarchhak state dang parukte  nena ramri km 2,616 an nei a, hengah hian buaina a awm vek a ni, an ti.