Central team-in Assam tlawh

Union Finance Ministry Adviser, Dina Nath kaihhruai central high-level team chuan Assam-in tuilian an tawrh dante a hmuna enfiah turin Thawhṭanni khan Guwahati an thleng a, ni hnih an cham ang.

Central team hi Assam state high-level team chuan lo ṭawiawmin, tuilian avanga chhiatna thlenna hmun hrang hrangte a hmunah kalin an fanpui a, hmalak dan tur an thlir ho a ni. Central team hian Lower Assam bakah, khawvela river river island lian bera puan Majuli an tlawh bawk. Majuli hi tun hnai khan District-ah hlan kai a ni a, tuilian tuar nasa ber zinga mi a ni. Majuli-ah hian tuilian danna siam tawh eng emaw zat chu thla hmasa lawka tuilian nasa tak khan a tichhia a, a siamṭhat dan tur leh siambelh ngaite an enfiah.

Assam-ah hian tuilian vangin mi nuai chuangin in leh lo an chhuahsan a, thlai chinna hmun zau tak chu tuilianin a chim bawk. Tuilian hi ziaawm tawh mah se, harsatna tawkte chhawmdawl hna thawh hian hun a la duh rei hle dawn a ni.

Union Minister of State for Water Resources, River Development & Ganga Rejuvenation Sanjeev Kumar Balyan chuan September 14 khan tuilianin chhiatna a thlen dante en turin Assam hi a lo tlawh tawh a, inter-ministeral team tirh a lo tiam tawh a ni.