Tarun Gogoi-a'n Citizenship Bill sawiho leh a phût

Assam chief minister hlui Tarun Gogoi chuan 'citizenship (Amendment) bill 2016' chu Parliament-a pharh a nih hmain state sorkar nena la sawiho leh phawt a phut tih a sawi.

Gogoi chuan bill chungchang chu sawiho leh ni thei se a duh tih sawiin, chu chuan kawng tam takaah rah ṭha a chhuah a rin thu a sawi. A kaihhruai Congress sorkar hun lai khan he bill hi Cabinet chuan a lo pawm tawh tih a sawi. India khua leh tui-te'n India an chhuahsan chhan leh, ram dang miten India an rawn luh chhan chu chhan tam tak a awm tih sawiin, sakhuana chu a chhan lian tak pakhat a ni, a ti. Refugee-te chu India khua leh tui an nih loh thu a sawi bawk.

Gogoi chuan Assam sorkar chu hemi chungchangah hian thla ruk chhunga White Paper peihfel hman tura a phut thu sawiin, Assam-a dan loa lut leh chhuak zat chiang tak report turin a ngen. Hei bakah hian Jati leh Mati-te dinhmun chiang taka tarlang tur leh, an tan state sorkar-in eng ruahmanna nge a siam tih te tarlang turin a phut a ni. Enviction drive kalpui mek chu fimkhur leh zaingai taka kalpui turin state sorkar a ngen bawk.

Citizenship (Amendment) Bill, 2016 hi Minister of Home Affairs, Mr. Rajnath Singh chuan July 19, 2016 khan Lok Sabha-ah a pu lut a, Citizenship Act, 1955 siamṭhatna tura tih a ni.