India-Myanmar ramri hung dawn lo : Nagaland CM

Nagaland Chief Minister T.R. Zeliang chuan sorkar laipuiin India-Myanmar ramri hung hna aiah, ramriah hmasawnna hna a thawk tawh zawk dawn niin North East Connectivity Summit vawi thumna neih zawh takah a sawi.

T.R. Zeliang chuan,"India-Myanmar border hung aiah hian ramriah infrastructure ti changtlung tura hmalak a ni dawn a, inkalpawhna kawngpui ṭha siam tum a ni" a ti. Hemi chungchangah hian hmarchhak state pali - Nagaland, Manipur, Mizoram leh Arunachal Pradesh-te chuan sorkar laipuiah rawtna an thlen tawh tih sawiin, sorkar chuan he rawtna hi a pawm tih Summit-ah hian a sawi a ni.

Nagaland CM chuan sawi zawmin, ramri hung loh avang hian security a chhiat phah dawn lo a, ramri hnaiahte hian hmasawnna hna thawh a nih dawn avangin, a him zawk hle tura ngaih a ni, a ti. Ramri hnaia chengte chu hmun khatah chhunfin an ni ang a, hmasawnna pawh a ṭhang chak zawk dawn a ni, a ti.

Arunachal Pradesh (520 km), Manipur (398 km), Nagaland (215 km) leh Mizoram (510 km) te chuan Myanmar an ri a, ramri te hi hung loh an ni. A vaia ramri hung loh thui zawng hi km 1,643 a tling.

Summit neih zawh takah hian Zeliang chuan hun rei tak chhung National Socialist Council of Nagaland-Isak-Muivah (NSCN-IM) leh India sorkar-te'n inremna zawnga inbiakna an neih chungchang a sawi chhuak bawk. CM chuan, Prime Minister Narendra Modi leh Home Minister Rajnath Singh-te chuan state sorkar chu inbiakna neih mekah rawtna a neihte thlen turin a hriattir tawh tih a sawi. August 1997 khan inremna siam a lo ni tawh a, inremna tluantling a awm theih loh avangin inbiakna pawh ṭum 52 neih leh tawh a ni. NSCN-IM-te hian India aṭanga inlakhran tumin independent a sual a, kum 1947 hnuah mi 25,000 zetin nunna an chan phah tawh a ni.

Inbiakna neih leh mekah hian NSCN-IM chuan “Greater Nagaland” din an duh a, state
ṭhenawm pathuma Naga cheng mi maktaduai 1.5 vel chu in-zawmkhawm an phut a ni. Hetihlai hian a ṭhenawm state pathum - Assam, Manipur leh Arunachal Pradesh-te chuan hei hi an duh lo thung.