UDP-te'n Meghalaya sorkar dem

Meghalaya-a eptu party lian, United Democratic Party (UDP) chuan ‘Smart City’ project-a Shillong thlan tel a nih loh chhanah, rorel lai Cong-ress party chu mawh-phurtu a nih thu an sawi.

‘Smart City’ project chu a thawh thumna kalpui leh mek a ni a, khawpui eng emaw zat chu thlan chhuah an ni leh tawh. Hetih lai hian Meghalaya khawpui Shillong chu thlan chhuah zingah telh a ni lo. UDP hruaitu Bindo M Lanong chuan, Shillong chu khawpui hlun leh upa ber zing a mi a ni a, ‘Smart City’ project kalpuina tur khawpui thlan chhuah zinga a tel lo hi a pawi hle tih a sawi. Heng zawng zawngah hian state sorkar chu mawhphurtu a ni a, chu chu mipuite pawhin an pawm niin a sawi bawk.

State sorkar chu department enkawl hneh tawk lo leh, hma la chak tawk loah UDP vice president Allantry Franklin Dkhar chuan a puh bawk a ni.