SKM leh SPCC-te'n ITFT zirlaite thlawp

Sikkim Krantikari Morcha (SKM) leh Sikkim Pradesh Congress Committee (SPCC)-te chuan, Institute of Technology and Future Management Trends (ITFT)-a zirlaiten, ITFT-in zirlaite hnena degree a pek chhuah, University Grants Commission (UGC)-in a pawmpui lo nia sawia lungawi lohna an lantir chu an thlawp thu an sawi. ITFT hi State Social Welfare department-in a sponsor nia tarlan a ni.

Sikkim Subject Committee chuan state sorkar chu zirlaite hnena finfiah loh leh, belchian dawl lo course hawn sakah puhin, chhui chian an phut thu an sawi. SSC legal advisor OP Bhandari chuan ITFT-a zirlaite hmakhua chu ngaihtuah chian ngai tak a nih thu a sawi. Hetih lai hian state BJP chuan, he thil hi chingfel vat turin sorkar an kar a, chin fel thuai a nih loh chuan sorkar laipuiah thlen an tum thu an sawi.

State sorkar chuan Indira Gandhi National Open University (IGNOU) hriatpuinaa kalpui a nih thu a sawi ve thung. State Social Welfare Minister Tulshi Devi Rai chuan zirlaite chu state sorkar leh department ring ngam tura fuihin, chinfel thuai a nih tur thu a sawi.