Tripura CM insawifiah turin phût Assembly inkhawm tihtawp a ni

Tripura Chief Minister Manik Sarkar chu ‘North East Connectivity Summit’-a a thusawi avanga ngaihdam dil tura an phût hnuah, Trinamool Congress (TMC) MLA-te'n House an chhuahsan zui avangin Zirtawpnia Tripura assembly session neih chu tihtawp a ni.

TMC-te'n CM ngaihdam dil tura an phûtna chhan hi, India chu a ṭhenawm ramte laka ṭhat chhuah lo tura a tih vang nia tarlan a ni. Sarkar chuan, "India chu a ṭhenawm ramte lakah
ṭhat chhuah lutuk lo tur leh, ram pahnih tana ṭha turah chauh ram dang lakah ṭhat chhuah turin thurawn ka pe a ni", a ti. "India khua leh tui kan nih chuan India-in foreign policy a kalpui danah rawtna kan nei thiang a ni" tiin, House member-te hmaah a thusawi chungchang a sawifiah.

TMC MLA Sudip Roy Barman chuan Chief Minister-in ‘North East Connectivity Summit’-a thu a sawinaah India chu mualpho takin a chhuah a ni, a ti. Federation of Indian Chambers of Commerce and Industry (Ficci) leh Tripura sorkar-in ni thum awha ‘North East Connectivity Summit’ an buatsaih hi Russia, Japan, Myanmar, Bangladesh, Nepal leh Bhutan aṭang te in sorkar mi pawimawh tak takin an chhim a ni.

August 23-a Agartala-a tharum thawhna thleng chungchang sawiho Congress MLA-te'n an phut chu, speaker-in a hnawlsak avangin Congress MLA te chuan House an chhuah-san bawk. Congress MLA-te chuan mi 24 zet thihna thleng chu House-ah hian sawiho an phut thu leh, pawikhawihna thlen chhan chhui chhuah vat an phut thu an sawi. Congress chhuahsana TMC zawmtu Manas Bhunia pawhin, Tripura Governor Tathagata Roy chu Sarkar-a thusawi chungchangah ṭawngchhuak tura a phut thu a sawi chhuak.

Tripura-ah hian Left Front chu kum 23 chhung zet a sorkar tawh a ni.