Delhi-ah Kaziranga Eviction drive duhlohna kawngzawh huaihawt

Kar kalta Zirtawpni khan Delhi Action Committee Against Kaziranga bultumin, Delhi-ah Kaziranga Eviction Drive avang thihna thleng duh lohna kawngzawh neih a ni.

He hunah hian zirlai leh pawl hrang hrang aiawh
ṭhahnem tak an tel. He huna thusawitu Bonojit Hussain chuan, BJP chu Assam state inrelbawlna kawnga inrawlh thuk lutukah puhin, tun hnaia Raha mipuite leh police-te inkara buaina chhuakah pawh mawhphurtu an nih thu a sawi. Kaziranga-a eviction drive kalpui dan chu a dik tawk lo tih sawiin, heng khaw pahniha chengte sawn chhuahna tur hmun ngaihtuah sak lo leh, zángnadawmna pe duh loah sorkar a puh bawk. Assam Chief Minister Sarbananda Sonowal leh Finance minister Himanta Biswa Sarma-te chuan mipui hnenah ngaihdam an dil tur a ni, a ti. Lungawilohna lantira pungkhawmte hian National Human Rights Commission-ah petition thehluh an tum thu an sawi.

September 19 khan Guwahati High Court thupek bawhzuiin, state sorkar chuan Kaziranga area huamchhunga khaw pahniha cheng te chu nawr chhuah tumin a bei a, buaina chhuakah Anjuma Khatun leh Fakhruddin-te chu an thi a ni. Sorkar hmalakna duh lo hian Krishak Mukti Sangram Samiti (KMSS) leh All Assam Minority Students’ Union (AAMSU)-te chuan Banderdubi khuaah lungawilohna an lo lantir tawh bawk.. Lungawilote chuan sorkar chu an inbenbelna hmun tur ruahman sak tur leh zángnadawmna pe turin an phût.