Nagaland : Thli tleh leh ram kangin chhiatna a thlen

Nagaland khawpui Kohima leh a chhehvel hmun pasarihah Pathianni khan thli a tleh bakah ram a kang. Kangmei chhuak tam zawk hi an thunun thei tawh a, a kan chhan tak erawh hriatchian a la ni lo. Thlipui tleh vangin Kohima-ah thingkung tluin motor pathum a delh chhe bawk.

Ram kang thlenna hmunte hi Meriema, Chakhabama, Seikhazou D. Khel Kohima Village, Medical College huamchhung, D. Block leh Lower Forest Colony-a hmun pahnihah a ni. North Kohima Fire Station-a Chumbemo Patton, SI (O.C) chuan ram kangah hian thi leh hliam tuar an awm lo niin a sawi.

Pathiannia thli na tak tleh chuan Nagaland Olympic Office (NOA) bula thingkung a ti tlu a, lirthei pathum vel a tichhe bawk. Home Department hnuaia Nagaland State Disaster Management Authority (NSDMA) chuan state pumah thlipui tleh vangin chhiatna nasa tak a thlen thu an sawi. Commissioner leh secretary Lhouchalie Viya chuan Kohima, Kiphire leh Noklak district-ah thli tleh hi an tuar tih a sawi. Kohima-a thingkung tlute chuan Raj Bhavan Colony leh VIP quarter engemaw zata lirthei a tihchhiat thu an sawi bawk.

NSDMA chuan chhiatna thleng zawng zawng chu an zirchiang mek tih sawiin, District Disaster Management Authorities-te hnen aṭanga report dang an nghah thu an sawi.