Assam: Cyber hmanga inbumnaah mi 3 man

Assam police-te chuan cyber hmanga inbumna lian tham tak kaihhnawihah mi pathum an man. An mi mante hian RSN Crypto Currency Token tih hmangin mi tam tak an bum nia sawi a ni.

DySP (DSB), DySP (B), leh SI (P) Ishan Jyoti Saikia kaihhruai police team chuan March 1 khan Kharuabandha out post-a duty-te puihnain cyber hmanga inbumna do beihpui hi an thlak a ni. Beihpui an thlaknaah hian Fakirganj Police Station huamchungah mi pathumte hi an man a, hetih lai hian an hotu ber nia sawi, Hekmot Ali Sarkar erawh a la bibo a, man tuma zawn mek a ni. FIR ziahluh ni tawhin, thuneitute chuan pawikhawihtu dang hriatchhuah chhunzawm zel an tum bawk.

Police-te chuan an mi mante hi thubuai siamsak nghalin, RSN Crypto Currency Token tih hming puin, Assam bakah an ṭhenawm state Meghalaya-ah nen mi 2,000 chuang an bum nia sawi a ni. Online gaming leh investment scheme hmanga bumin, a tlem berah Rs 50,000 invest turin an thlem a, a pung 2% pek zel an tiam bawk. An mi bumte aṭanga sum an hmuh hi Rs vbc 10-20 vel a tling nia sawi a ni. Online payment platform PhonePe, Paytm leh Chinese crypto exchange Binance te hmangin India pawisa chu USDT (US Dollar Token)-ah an chantir a, he pawisa hi international entity, tute nge tih hriat chian lohte hnenah an thawn ṭhin. An chet danah hian international cybercrime network-te nena inzawmna nei nia rinhlelhna pawh a awm a ni.

Hei bakah an mi mante hian ram puma cyber hmanga mi bum ching dangte hnenah thla khatah Rs 1,000 atanga Rs 2,000 lain bank account an hawh ṭhin tih hriatchhuah a ni bawk. He beihpui thlaknaah hian thuneitute chuan mobile phone pariat leh laptop pahnih bakah sim card 11 an man a, heng zingah hian inbumna nena inzawmna finfiahna tur pawimawh tak tak an man tel bawk.