Manipur-ah darkar 38 awh bandh huaihawt

Leilung fate humhalhna atana Manipur-a inner line permit (ILP) system kalpui phuttu, Joint Committee On The Inner Line Permit System (JCILPS)-in July 8-a kawngzawh a huaihawt ṭuma police te nen an innawrnaa, police kut tuara zirlai pakhat thih avanga lungawi lo Joint Action Committee (JAC) chuan nimin zing aṭangin darkar 38 awh bandh a huaihawt.

July 8 aṭanga state sorkarin Greater Imphal huam chhunga tiam chin awm loa curfew a puan chu nimin khan darkar 15 thlahdul a ni a, mahse JAC hian bandh a huaihawt hnan leh thung.

Sorkar official chuan Code of Criminal Procedure (CrPC) section 144 tlawhchhana curfew an puan chu la kentlang zel an tum thu sawiin, hriam hrei aṭana hman theih chi bungrua lek chhuah khap a ni bakah mi panga aia tam punkhawm phal a ni lo, a ti.

JAC chuan bandh chu zanin dar 7 thleng neih a nih tur thu tarlangin, sorkar chu zirlai pakhat, Sapam Robinhood Singh thihnaa mawhphurhtu police te hum tumah a puh.

JAC chuan Sapam Robin­hood Singh thihnaa mawh­phurtu police te chu chhui chhuaka, na taka hrem an phut.

Hetihlai hian ILP system phutin New Delhi-a Manipur pawl hrang hrangte chuan Thawhṭanni khan kawng zawh an huaihawt bawk.

New Delhi-a Mandi House aṭanga Jantar Mantar thlenga kawngzawhin, Prime Minister Narendra Modi leh President Pranab Mukherjee hnenah memorandum an thehlut nghal.

Delhi-a Manipur Students Union advisor hlui Seran Rojesh chuan Manipur-a mi­hring nuai 27 vel an awm thu sawiin, heng zinga nuai kua hi non-Manipur mi, pemlut an ni, a ti a, pemlutte khuahkhirhna dan a awm lo a ni, a ti.

Kawngzawhte hian Mani­pur mi leh sa dik tak chhinchhiah nan kum 1951 chu a tehnaa hman an duh thu an tarlang bawk a, kum 1951 hma lama Manipur-a awmte leh an thlahte chauh chu state khua leh tui dik taka chhiar an duh a ni.