SC-in HRC din turin NE state te a hriattir

Supreme Court chuan July 24-a thuchhuah a siamah hmarchhak state panga te chu thla thum chhunga state Human Rights Commission din turin a hriattir.

Hmarchhak state panga te hi Meghalaya, Mi­zo­ram, Arunachal Pra­desh, Tripura leh Nagaland te an ni. Hmarchhak state bakah hian Himachal Pradesh leh Delhi pawh Human Rights Commission din turin a hriattir bawk.

State HRC din tur chungchangah Megha­laya sorkar chuan Megha­laya State Human Rights Commission chairman tur judge chawl tawh an hmuh zawh loh avanga an din theih loh thu a lo tarlang tawh a, mahse Supreme Court hriattirna hi a dawn chuan state sor­kar chuan a bawhzui ngei ngei a ngai dawn a ni.

Meghalaya sorkar hian court hniam zawka judge hna lo chelh tawh, M.B. Challam leh Meghalaya DGP hlui P.J.P. Hanaman te chu State Human Rights Com­mission member-ah a lo ruat tawh a, mahse chairman a awm loh avang­in mumal takin an kal thei lo. State Human Rights Commission chairman atan hian High Court emaw Supreme Court judge chawl tawh an ngai a ni.

Supreme Court hian state HRC din tura hriattirna a tihchhuahah HRC chu thla thum chhunga din tur leh chairman leh member chu ruatfel nghal vek turin a hriattir a ni.