India-B'desh rel kawng siam hna thawk lo
Tripura Transport Secretary Samarjit Bhowmik-a'n Tripura khawpui, Agartala aṭanga Bangladesh, Akhaura thlenga kilometre 15-a thui rel kawng siamna atan sorkar laipuiin cheng vaibelchhe 1,000 a ruahman thu a sawi hnuah rel kawng siamna atan hian hmalak ṭan a nih loh thu Thawhṭanni-a Lok Sabha inkhawmah sawi lan a ni.
Tripura aṭanga India leh Bangladesh inkalpawhna rel kawng atan hian India lamah kilometre nga-a thui rel kawng siam a ngai a, mahse mimal ram lak man a san lutuk avangin hma lak zui rih lo a ni, tiin Union Minister of State for Railways Manoj Sinha chuan Lok Sabha inkhawmah a sawi.
India leh Bangladesh chuan kum 2013, February 16 khan Agartala-Akhaura rel kawng siamna tur memorandum of understanding (MoU) an ziak a ni.
"India ram lama mimal ram lak man sang lutuk avangin rel kawng project hi tunah chuan bawhzui lohin a la awm a ni," tiin Minister Sinha chuan a sawi.
India leh Bangladesh inkara rel tlan mek chungchang sawiin Union Minister Sinha chuan Kolkata leh Dhaka inkar, Gede (India)-Darsana (Bangladesh) inkarah Maitree Express a service mek tih a sawi.
Bungraw phurh nan Bangladesh leh India inkar, Singhabad (India)-Rohanpur (Bangladesh) inkarah kum 1972 aṭangin rel service tir a nih tawh thu leh Petrapole (India)-Benapole (Bangladesh) inkarah kum 1992 aṭangin rel a service tawh thu a sawi bawk.