Meghalaya district council te'n Anticipatory bail pe thei: SC
Khasi Hills Autonomous District Council thutlukna Meghalaya High Court-in a ṭhiahsak chu Supreme Court bench chuan a stay sak.
Meghalaya tribal te chenna huam chhungah kum 60 dawn chu sessions judge emaw Criminal Procedure Code (CrPC) tlawhchhanin pawikhawihnaa inhnamhnawihte thubuai ngaihtuah a nih ngai loh bakah anticipatory bail pek an ni ngai lo a, mahse tun hnai khan Khasi Hills ADC chuan a thuneihna hmangin pawikhawihtute hnenah anticipatory bail a pe a, hei bakah hian mipuite khuahkhirhna thupek (prohibitory order) a siam ṭan bawk.
KHADC-in hetianga thuneihna a hman chungchangah Meghalaya HC chuan suo moto case siamin, KHADC thuneihna chu a khap a ni. KHADC chuan HC thutlukna chu Supreme Court-ah a khinlet avangin Meghalaya HC thutlukna hi chawlhtir rih a ni a, hemi chhung hian KHADC chuan pawikhawihtute hnena anticipatory bail a pek theih bakah a ṭul chuan prohibitory order a chhuah thei rih dawn a ni.
Justice Dipak Misra leh Justice P C Pant te awmna Supreme Court bench chuan, "Meghalaya tribal area chu sessions judge thuneihna huam chhung a nih loh avangin District Council te chuan an thuneihna hmangin pawikhawihtute hnenah anticipatory bail an pe a ni," a ti.
Supreme Court-a Supreme Court aiawhtu senior advocate Vijay Hansaria chuan Meghalaya HC thuchhuak chuan India danpui, Sixth Schedule-in District Council te hnena thuneihna a pek a a hlihsak a ni, a ti.
"Sessions judge te chuan Shillong municipality leh a thuneihna huam chhunga thubuai chauh an ngaihtuah thei a ni," tiin advocate Hansaria chuan a sawi.