Thingpui thar tihpun tumin Arunachal inbuatsaih

Arunachal Pradesh chuan state chhunga thingpui thar chhuah tihpun tumin, tea industry tihchangtlun a tum a, hemi atan hian loneitute pawhin sorkar scheme hnuaiah nasa zawka thingpui huan siam an tum.

Chief Minister’s mission mode project (MMP) hnuaiah state sorkar chuan nasa zawkin loneitute hnenah thingpui chin a thehlar mek a, loneitute chu thingpui ṭiak 13,000 pek an nih bakah huan hectare khata zau hungna tur, barbed wire a thlawnin a sem bawk.

Chief Minister Nabam Tuki chuan July 15-a budget thuchah a sawiah thingpui chin kawnga hmalakna atan kum 2015-16 state budget-ah vaibelchhe nga dah a ni, a ti. Kum kaltaa state budget-ah pawh khan vaibelchhe nga dah a lo ni tawh bawk a, loneitu 465-in a hlawkna an chhawr a ni.

Kum 2013-14 khan Aruna­chal sorkar chuan tea unit 465 a lo siam tawh bawk a, kum 2012-13 ah unit 285 siamin, vaibelchhe thum a semchhuak bawk.

"State sorkar chuan thingpui chin thehlar kawngah Tea Board of India a thawhpui dawn a, anni hian loneitute chu thiamna ngaite an zirtir bakah a hralhchhuah lam thlengin loneitute an pui dawn a ni," tiin CM Tuki chuan a sawi.

Arunachal Chief Minister chuan thingpui huan siam chu thingtlang mite'n ei leh barah an hlawkpui theih tur thu sawiin, hna nei lote ṭan hna siamna a ni nghal ang, a ti.

Hetihlai hian state sorkar kaihhruaina hnuaia thingpui huan siamtu, loneitute chuan state sorkar hmalakna chu an hlawkpui thu sawiin, sorkar ṭanpuina tam zawk an la mamawh thu an sawi.

East Siang district, Oyan khuaa thingpui huan siamtu, Bimal Lego chuan hectare khat enkawlna atan chauha ṭan­puina an hmuh chu a tawk loh thu sawiin, hectare 2 aṭanga hectare nga thlenga ṭanpuina an mamawh thu a sawi a, huan enkawlnaa kum thum thleng sorkar ṭanpuina an mamawh thu a sawi.