Sikkim: CM-in project siamna tur lungphum a phum

Sikkim chief minister Prem Singh Tamang chuan Siliguri-a SNT complex, ram acre 2.1-a zauah healthcare centre, guest house leh bus terminus siamṭhatna tur lungphum a phum. Rs vbc 197 senna tur project hmang hian Siliguri-a sorkar office hrang hrangte chu SNT complex-a hmun khatah dah a tum bawk.

SNT hmuna infrastructure tih changtlun hi state sorkarin hun rei tak aṭanga a lo ruahman tawh a ni a, a bul hnaia structure leh chenna in awmte avangin harsatna an tawk a ni. Mahse CM Tamang chuan ṭhenawm ramte bakah West Bengal sorkar leh Siliguri Municipal Corporation nen inremna an siam thei tawh a, in sak hna pawh an thawk thei dawn tih a sawi.

Healthcare center-ah hian room 50 a awm dawn a, choka bakah medical staff te awmna tur siam a ni ang. High ranking official - Governor, Chief Minister leh minister te awmna tur pawh siam tel a ni bawk ang. Hei bakah automatic bus parking, taxi dahna, leh shopping complex te pawh a awm dawn. Heng zawng zawng hi thla 24 chhunga sak zawh hman tum a ni.

CM Tamanga chuan healthcare centre siam chu Sikkim mipuite tan a ṭul hle tih sawiin, mi tam tak chu Siliguri-ah inenkawl tur bakah mamawh dangte dapin an kal a ngaih ṭhin thu a sawi. Healthcare centre chu private nursing home pan zo lote tan a ṭangkai dawn a, guest house angrengah pawh a hman lailawk theih dawn bawk a ni, a ti.