Delhi atangin NE a tihhmasawn theih loh: PM Modi

Prime Minister Narendra Modi chuan Delhi aṭangin hmar­chhak bial a tihhmasawn theih loh thu sawiin, a dinhmun enfiah ṭhin turin sorkar laipuiin a hmunah official tirh a tum thu a sawi.

"Delhi-a ṭhu chungin hmar­chhak bial hmasawn nan a thawh theih em? A chhanna chu theih loh a ni. Sorkar laipui official te chuan hmarchhak bial tlawhin a dinhmun an enfiah ṭhin dawn a ni," tiin Modi chuan a radio programme, 'Mann Ki Baat'-ah a sawi.

Sorkar laipui team te chuan hmarchhak biala district leh thingtlang khaw hrang hrang tlawh kualin mipuite chu an kawm ang a, an harsatnate hriatpui an tum dawn a ni, a ti.

Radio-a thu a sawiah Prime Minister Modi chuan India ram thingtlang khaw tina electric eng chhittir tur chungchang sawiin, a kaihhruai sorkar chuan theihtawp chhuahin a bawhzui mek a ni, a ti.

Modi chuan zirna sang lamah zirlai tlemte chauhin science subject an umzui ṭhin chu a ngaihmawh thu a sawi bawk.

"Zirlai 100 aṭangin pa­khat emaw pahnih chauhin zirna sangah science a zir chhunzawm ṭhin a, hei hi thil ngaihmawhawm tak a ni. Science subject zir uar turin zirlaite fuih an ngai a ni," tiin a sawi.