India-B'desh rel kawng atan vbc 1,000 ruahman

India-Bangladesh inkalpawhna tur, rel kawng kilometre 15 siamna atan sorkar laipui chuan vaibelchhe 1,000 a ruahman.

Tripura Transport Secretary Samarjit Bhowmik chuan he thu hi sawiin, sorkar laipui chuan rel kawng siamna atana mimal ram lak nan vaibelchhe 580 a pekchhuah thu a hriattir tih a sawi.

Bangladesh ram lama rel kawng siamna leh mimal ram lak nan External Affairs Ministry chuan vaibelchhe 400 a lo ruahman tawh bawk.

India leh Bangladesh inkalpawhna atana rel kawng kilometre 15-a thui siam turah hian India lama Tripura ramah kilometre nga-a thui rel kawng siam a ni ang a, Bangladesh lamah kilometre 10-a thui a ni. Rel kawng hi Agartala aṭanga Bangladesh, Akhaura rel station thleng siam a ni ang.

Tripura Transport Minister Manik Dey chuan rel kawng siam chu Tripura leh Bangladesh economy-in a hlawkpui tur thu sawiin, ram pahnihte sumdawn tawnna a tihlen tur thu a sawi.

Rel kawng hi hman a nih chuan lei lama Agartala leh Kolkata inkar kilometre 1,650-a hla chu kilometre 515-ah a hniam phah dawn a ni.