Hepatitis natna lakah NE mipuite An fimkhur a ngai: Health expert

Health lama mi­thiamte chuan hmarchhak bial chu hepatitis B leh C natna hluarna hmun a ni tih sawiin, mipuite chu fimkhur turin an ngen.

World Health Orga­nization report chuan khawvela mihring 12 zela pakhatin hepatitis B emaw hepatitis C natna an vei tiin a tarlang.

Vawiina World Hepatitis Day hman turah mipuite chu hepatitis B leh C natna chungchanga hriat tur pawimawhte uar taka zirtir a pawimawh thu mithiamte chuan an sawi bawk a, hmarchhak bial mihring awm zawng zawng aṭangin 1.9% velin hepatitis C natna an vei thu an sawi bawk.

Health expert te chuan hmarchhak biala hepatitis natna vei awm zat leh an chanchin kimchang record neih a pawimawh thu a an sawi bawk a, Nagaland, Manipur leh Mizoram te chu hepatitis C natna vei tamna hmun a ni, an ti.

Assam-ah chuan hepa­titis C natna vei tlem mah se Guwahati chu hmarchhak bial kawt­chhuah a nih avang­in natna hluar theihna hmun a ni, an ti.

"Assam-ah chuan hepatitis B natna ai chuan hepatitis C natna vei an tlem zawk a, Arunachal Pradesh pawh Assam ang tho a ni, state pahnihah hian ruihhlo inchiu chi hmangtu (injection drug users-IDU) an tlem a ni. IDU tlem mahse Hepatitis C natna vei an awm tho a ni. Hepatitis natna bikah chuan thisen pek aṭanga kaite leh hepatitis natna vei nu-in a fa hnute tui pek aṭanga kaite vangin hepatitis B natna vei an tam phah a ni," tiin Gauhati Medical College and Hospital (GMCH) Gastroenterology de­part­­ment-a head BD Goswami chuan a sawi.

Indian Council of Medical Research-a investigator hlui GK Medhi chuan kum 2009 zir chianna a neiah Manipur, Surachanpur leh Bishnupur-a IDU zingah hepatitis C natna vei an tam thu a sawi.