Union minister hlui Handique a thi

Assam Congress party mi hlun, Union Minister hlui Bijoy Krishna Handique (82) chu Pathianni khan Jorhat-ah a thi.

Handique hi Inrinni khan lung natna avangin Jorhat Medical College and Hospital-ah admit a ni a, Pathianni khan a dinhmun a chhiat avangin intensive care unit (ICU)-ah dahluh a ni a, a boral zui nghal a ni.

Kum 1933-a piang Handique hi sorkar laipuia UPA-II sorkarah Minister for Mines leh Development of North Eastern Region (DoNER) Minister hna a lo chelh tawh a, UPA-I sorkarah khan Union Minister of State for Defence, bakah Minister for Parliamentary Affairs, Mines, Chemicals and Fertilizer hna a lo chelh tawh bawk.

Assam Legislative Assembly-ah kum 1972 khan a vawi khatna atan thlan tlin a ni a, kum 1973-ah AICC member niin, kum 2002-ah Congress Working Committee member-ah ruat a ni leh bawk.

Handique hian a thih hmain Jyoti Eye Hospital-ah a mit a donate a ni.