Myanmar-in ramri-ah vengtu sipai dah belh tum

Hmarchhak biala hel, a rama inkulhte dolet­na kawng khat atan Myan­mar sorkar chuan India nena an ramri-ah venghimtu sipai dah belh a tum.

Ministry of Home Affairs (MHA) official chuan he thu hi sawiin, Myanmar Army Chief Min Aung Haing-a India rawn tlawh chuanin hel doletna kawnga ram pahnihte thawhhona a tihchak a beisei thu a sawi.

Myanmar Army Chief hian Pathianni khan ramri venhimna chungchangah Union Home Minister Rajnath Singh, Chief of Indian Army Dalbir Singh Suhag leh National Security Adviser (NSA) Ajit Doval te meeting neihpuiin, hmarchhak hel zalen taka Myanmar rama chetla ṭhinte ven nan ramria sipai dah belh an tum thu hi a sawi a ni.

"Myanmar chuan India ram dodal zawnga chete chu a ram chhungah zalen taka chettlat a phal ngai lo ang," tiin Myanmar sipai hotu chuan a sawi.

MHA official chuan, "India thil ngaihmawhte chu Myanmar-in min hriatpui tawh a, tunah chuan a thutiamte chu a takin a tipuitling ang em tih kan thlir mek a ni," a ti.

Indian Army te'n hmarchhak helte beih­let­naa Myanmar rama beihpui thlak a tul a nih pawhin Myanmar chuan dodal a tum loh thu Army Chief Haing chuan a sawi bawk.

Hetihlai hian June 4-a, NSCN (K) helte'n Ma­nipur-ah Army con­voy lambun a, sipai 18 an kahhlumna thubuai chhuitu, National Inves­tigation Agency (NIA) chuan NSCN-K helte chanchin kimchang Myanmar sorkar a dil.

India leh Myanmar hian Mutual Legal Assis­tance Treaty (MLAT) an ziak tawh a, hemi hmang hian ram pahnihte chuan hel beihletna leh pawi­khawihtu chhui kawngah thawhho an rel a ni.

Sipai 18 kaphlumtu NSCN (K) hel pawl hotu S S Khaplang-a chu Yangon-a damdawi-inah enkawl mek a ni tiin an sawi a, hei vang hian NIA chuan a chanchin hi a dil a, hei bakah hian Myanmar-a NSCN (K) te inkulhna hmun te, tualchhung mi an thawh­pui te leh a chenna address kimchang a dil bawk.