Naga peace talk kuminah chinfel hman kan beisei: Ravi

Naga helpawl, National Socialist Council of Nagaland Isak-Muivah (NSCN-IM) leh sorkar laipuiin inremna zawnga inbiakna an neih mekah sorkar laipui aiawhtu, interlocutor RN Ravi chuan kumina chhunga remna tluantling an siam hman a beisei thu a sawi.

Nagaland Post zawhna chhangin Ravi chuan he thu hi a sawi a, "Remna tluantling siam turin kan bei mek a ni a, November thla ral hmain kan siam thei ang ka ti lo, mahse kuminah ngei chuan remna kan siam hman ka beisei," tiin a sawi.

Huam zau zawka inbiakna kalpui tum chungchangah Ravi chuan Naga pawl hrang hrangte chu inbiaknaa teltir turin hma an la mek tih a sawi a, Naga Political Group (NPG) zawng zawng chu inbiakna teltir chi a ni ang em tih zirchiang tur zawkin Nagaland tlawh thuai a tum thu a sawi bawk.

Ravi chuan National Security Agency (NSA) Ajit Doval nen Pathianni khan New Delhi, Fortis Hospital-a enkawl mek, NSCN (I-M) chairman Isak Chishi Swu an tlawh thu a sawi a, a hriselna pawhin ṭhat lam a pan zel tih a sawi bawk.

Isak Chishi Swu hi July 5 khan Fortis damdawi-ina Intensive Care Unit (ICU)-ah dah a ni a, ventilator hmangin ni hun eng emaw chen thawktir a nih hnuah tunah chuan ventilator hman ngaiin a awm tawh lo a ni. Doctor te chuan a kal ṭha loin ngai a awh chho leh tawh an ti a, a thisen sang pawhin ngai a awh leh tawh tiin an sawi.

Nagaland tana zalenna sualtu NSCN (IM) leh sorkar laipui hian kum 17 kalta khan inkahhai thuthlung an ziak tawh a, remna tluantling la siam loin, inbiakna an kalpui mek a ni.