Assam cab operator-ten state ramriah kawng dan an tum

Assam-a commercial vehicle association-te chuan Covid-19 leng vanga an ṭhenawm state-ten Assam aṭanga motor lut tura khuahkhirhna an siam duh loin, vawiin aṭangin an state ramriah kawng dan an tum. 

Assam ṭhenawm state-te chuan Assam aṭanga an state-a motor lutte entry point-ah lo dangin, driver-te chu Covid-19 test nei zel turin an ti a, an test-na senso pawh hi anmahniin an intum a ni. An negative hnuah chauh luh phalsak an ni ṭhin. Meghalaya leh Arunachal Pradesh-ah chuan driver-te hi Rs 500 chawi tir zel an ni bawk. 

State dangten Assam driver-te lakah khuahkhirhna an siam danah commercial driver leh taxi association-te chu an lungawi lo hle a, state transport minister Chandra Mohan Patowary pawh an hmu tawh tih an sawi. Mahse harsatna an la tawh chhunzawm zel vangin ramri dan hi an tum ta tih All Assam Cab Operators Union president Ismail Ali chuan a sawi. Assam entry gate hrang hrang dan an tum hi pawl 40-in an thlawp thu Ali chuan a sawi bawk.