JUH-in Assam NRC coordinator laka lungawi lohna thlen

 Jamiat Ulama-i-Hind (JUH) chuan tun hnaia Assam-a National Register of Citizen (NRC) coordinator thar, Hitesh Dev Sarma-a'n NRC-a dan loa dahte hming paih vek tura thupek a tihchhuah chungchangah Supreme Court-ah lungawi lohna an thlen. 

October 13 khan NRC coordinator thar hian  state chhunga District Registrars of Citizen Registration (DRSR) tin hnenah hriattirna pein, NRC-a dan loa dahte leh an thlahte chu paih turin a ti a ni, tiin JUH chuan an tarlang. Hei hi NRC aṭanga Muslim mite paih tuma hmalakna nia an ngaih thu an sawi a ni. 

JUH hotu Arshad Madani chuan he thupek tichhuaktu, Hitesh Dev Sarma hian state coordinator a nih hma pawhin Assam citizenship chungchangah inhnialna chawk chhuak thei lam thu a lo sawi fo tawh a ni, a ti. 

State coordinator atana ruat a nih pawh khan JUH chuan ruat a nih dan chungchangah Supreme Court-ah petition a lo thehlut tawh bawk.