Sorkar laipuiin Assam-ah mithiam tir dawn

Union Health Ministry chuan Assam-a sikserh natna chi khat, Japanese encephalitis (JE) leng mek khuakhirh dan ngaihtuah turin mithiam tirh a rel. JE natna hi mi 60 chuangin an thihpui tawh.

JE natna chungchanga review meeting neihah kar kalta Inrinni khan Health Minister JP Nadda chuan sorkar laipuiin India ram hmun hrang hranga JE natna len dan chu a vil reng a ni, tiin a ṭul chuan sorkar laipuiin a puih theih reng a ni, a ti.

"Health Services Director General chu Assam-a expert team tir thuai turin hriattir a ni tawh a, mithiamte hian a ṭul angin Assam-a health official te an pui dawn a ni," tiin Nadda chuan a sawi.

Nadda chuan JE natna khuahkhirh nan Assam chu kawng engkima puih an nih tur thu a sawi bawk a, Union Health Ministry-a senior official te chu state health official te nen an inbepawp reng a ni, a ti.

National Vector Borne Diseases Control Programme-a Additional Director chuan July 22 aṭangin Assam a ṭhutchilh tawh bawk.

Union Health Ministry report chuan Assam-ah hian JE natna vei 365 an hmuhchhuah tawh thu a tarlang a, heng zinga 66-in an thih phah tawh a ni, a ti. Tun hnai khan Assam Sivasagar district-ah 9, Dibrugarh-ah 7, Jorhat 7 leh Golaghat-ah 4 an thih belh leh bawk.

Review meeting-ah hian Assam-a JE natna vei tam zawk hi puitling an nih tih sawilan a ni a, Assam-a district 12-ah chuan JE vaccination campaign kalpui tawh a ni bawk.