Hmarchhak mite hnaah chhawr theih loh

Hmarchhak bial hi ziak leh chhiar tamna ni mah se thiamna mamawh bik nei an tlem avangin hnathawka chhawr theih an tlem hle. Hemi chungchang hi Human Resource Development & Employment-in kar kaltaa North Eastern Council (NEC) secretariat, Shillong-a regional review meeting a buatsaihah sawi lan a ni.

Meeting hi IES Economic Advisor W Synrem kaihhruaina hnuaia neih a ni a, hmarchhak state-a planning leh line department-a senior official te an tel.

Meeting chuan Education leh Skill development bikah hmarchhak bial dan ruahmanna thar siam a rel a ni. Hmarchhak bialah lehkha thiam leh ziak leh chhiar thiam tam mah se hna thawk thei an tlem thu tarlan a ni a, hei vang hian hmarchhak ṭhalaite'n hna an hmuh nghal theihna tur skill training lam uar zawka kalpui ṭha an tih thu an sawi.

State tin aṭanga meeting telte chuan sorkar laipuiin Skilling India Mission a kalpui mek tihpuitlin nan hmarchhak bialah skill development institute hawn ṭha an tih thu an sawi bawk. Member te chuan hmarchhak bial aṭanga zirna sang zawk bawhzui tura chhuak tam lutuk chu an ngaihmawh thu tarlangin, hmarchhak bialin school leh college changtlung zawkte leh skill development education a mamawh thu an sawi.

Hmarchhak zirlaite'n tun aia nasa zawka technical leh professional course an umzui theih nan meeting chuan hmarchhak bial school-a mathematics leh science subject zirtirna pek dan tihchangtlun a ṭul thu an sawi a, heng subject pahnihah hian zirtirtu ṭha leh thiam mamawh a ni, an ti.

Hmarchhak bial mipuite dinhmun chawikan nan education kalphung ṭha mamawh a nih thu leh infrastructure hmasawnna mamawh a nih thu an sawilang bawk.