Delhi police-in dik lo takin Manipur zirlai a man CJRR-in Manipur zirlai tan rorelna dik phut
Committee for Justice and Release of Rahul Moirangthem chuan Delhi police te'n dik lo taka an puh avanga an man, Manipur zirlai, Rahul Moirangthem tan rorelna dik a phut.
Rahul hi February 13, khan Delhi Police te chuan New Delhi, Vasant Vihar-a Holy Child Auxilium School suasam chungchangah an man a, mahse school suasamnaah hian a inhnamhnawih loh thu leh he school hi a hriat ngai loh thu a sawi.
CJRR chuan kar kalta Zirtawpnia New Delhi, Press Club of India-a press conference a kohah Rahul-a tan rorelna dik hlenchhuah phutin, dik lo taka puhtu police te chu hrem a phut bawk.
"Rahul chuan Holy Child Auxilium School hi a awm leh awm loh pawh a hre ngai lo a, school hi a la tlawh chhin lo bawk. Police te'n Rahul-a kut thla (fingerprint) leh Holy Child Auxilium School Principal office-a pawikhawihtu kut thla inmil tia an sawi hi thu dik lo a ni a, Rahul-a dik lo taka puh tumna mai a ni," tiin CJRR thuchhuak chuan a tarlang.
Rahul hi Kristian a nih thu tarlangin, Kristian school, Holy Child Auxilium School suasama puh a ni hi thil awihawm loh tak a ni, tiin a tarlang bawk.
"May 29 zan khan Delhi police te chuan Rahul-a an man hnuah lehkha phek ruak pali-ah hming ziak turin an nawr lui a, lehkha phek pali-ah hian a kut thla an nem kaitir bawk. Hei hi thil pawi tak a ni a, Delhi police te chuan a kut thla hi dawta amah puhlet nan an hmang a ni. A kut thla an lak chhan hi sawifiah ngai a ni," tiin CJRR chuan a tarlang bawk.
Delhi Police te hian Rahul-a hi an man hnuah Holy Child Auxilium School-ah hian vawi hnih hruai tawhin, video-a record a ni tiin, CJRR chuan a sawi a, police te hian video-a an record hi pawisawilo Rahul-a puhlet nan an hmang a rinawm a ni, a ti.
Delhi police te hian Rahul-a chanchin chhe tak tak dik lo takin media-ah an tarlan thu CJRR chuan a tarlang bawk a, media te'n Rahul-a chanchin a chhungte zawt hmasa loa hetianga dik lo taka an puangchhuak hi a vanduaithlak hle a ni, a ti.
Rahul-a chu a rang thei ang bera chhuah zalen phutin CJRR chuan media te chu thu dik chauh tarlang turin a phut bawk.