Meghalaya-in Covid-19 kaihhruaina siamṭha

Meghalaya Health and Family Welfare Depart­ment chuan an state-a Covid-19 test chungchanga kaihhruaina a siamte ennawnin a siamṭha. 

Kaihhruaina siamṭhat hnuaiah hian state dang aṭanga Meghalaya-a lutte chu http://meghalaya­online.gov.in/covid/testing.htm ah in register vek tura tih an ni a, Megha­laya an luh hmain an mobile phone-ah Arogya Setu App leh Behavioural Change Management App of Meghalaya an download lawk vek a ngai bawk. 

Covid-Negative report neite chu test nawn kher ngai loin an luh phalsak an ni ang a, mahse an report neih chu Meghalaya an luh hma darkar 72 chhunga mi a ni tur a ni. An test neihna hmun hi sorkarin a pawm laboratory a ni ngei tur a ni a, RT-PCR/TruNat/CBNAAT/RAT pawm a ni ang.  Darkar 48 huam chinah chuan RAT Negative report chauh pawm ani thung ang. 

State dang aṭanga lut, Covid-Negative report nei lote chu entry point tinah  test an ti thei dawn a, test man hi sorkarin a bithliah anga lak a ni ang. Test nan hian  Rapid Antigen Test (RAT) emaw RT-PCR emaw an thlang thei ang. 

Sorkar chuan Covid-Negative report nei, state dang aṭanga lut, symptom nei lote chu an inkhung hran kher a phut tawh lo a, an nitin hna an thawk chhunzawm thei nghal ang. Hetih lai hian entry point-a RT-PCR hmanga test-te erawh chu an result a chhuah hma chuan inkhunghrang tura tih an ni a, result hi darkar 48 chhungin a chhuak hman tlangpui a ni. 

State pawna hun rei lote zin chhuakte pawh an haw lamah entry point-ah RAT test neih leh vek an ngai a, an negative chuan in khunghran kher a ngai lo ang. Entry point-ah an zinna document, air/rail  ticket emaw, taxi voucher leh a dangte an hmuhtir a ngai ang.